RAMBUT KARACUNAN SAMPU

Nining Randa Balu ni sudah tuha, labih saparu baya limpat satangah abad. Kikira asa labih 65 umur sidin niya. Apa mun muha takariput, kulimbit pina kisut, pipi kimput, susu bakalirut.

Tapi bujur haja sidin tuha tapi masih liwar bigasnya, bajalan kada bungkuk apalagi pakai tungkat. Urang sidin maambil upah mangatam haja masih kawa kulihan sapuluh balik sahari, bairik, balabang, kaya urang anum jua.

Ngaran sidin ni sabujurnya Sariyah, tagal dikiyaw Nining Randa lantaran cucu sidin nang pangganalnya bangaran Miranda. Han, harat banar ngaran cucu sidin ni leh, kajadian pangaruh sinatrun di tipi pang. Amun Balu te artinya lantaran sidin janda, laki sidin (kai Ibus) mati ditimbak patir pas rahatan batanam talu walas tahun nang lalu.

Jadi leh Nining Randa ni ada lagi sapasal kaanihan dalam diri sidin nang tuha tu. Rambut sidin liwar hirangnya, sabilah kadada bahuban. Han, anih banar luku, padahal mun saumuran sidin tu ada nang putih sampai ka kaning-kaning.

Napa rahasia rambut sidin mahirang maikal mayang lacit ka pinggang te sakalinya matan kakanak bujangan sidin rajin bakasay rambut wan minyak lala, bila bakujamas sidin pakai santan dirasapakan hanyar dilibas langis-langis. Saban ari Jumahat musti sidin mambanam kuminting, ditumbuk dalam lasung gangsa lalu diambil minyaknya, hanyar dikulay ka rambut. Makanya liwar labat wan hirangnya rambut sidin.

Kada nangkaya kakanak wahini rami banar baribunding, sambung rambut sagalaan. Padahal rambut jadinya rahaw, karaw kaya sasapu haduk taculup di licak.

Pas kaya kalakuan Si Utuh, cucu Nining Randa nang paanumnya, nang umurnya hanyar lima walas tahun. Rambutnya habis bahabang-habang, jambulnya pina biru. Bamamang paniniyan maliat pacucuan gawian nangkaya urang kapir.

“Batuah banar ikam ni Tuh ay, rambut kalalangkaran warnanya hirang maka dikalir habang! Sah sudah, nyata kupala ikam ni KARACUNAN SAMPU !”

Papar sidin bagarunum, rambut bawarna tuti dikira sidin lantaran sampu gasan rambut bakujamas. Sidin kada tahu amun wahini rami mawarnai rambut pakai cat lampit supaya mirip wan bubuhan Japang atawa buyben Kuriya. . .

Dintu sakalinya. . .

Gambar mainta matan: ijs.blogspot.com