SI PULAN BULIK KA BANUA

Ada pang sudah mun kikira manaluwalas tahun sudah si Pulan madam pada banua. Asal mula umpat pa haji Asli mandangani badagang pancarakinan di Pasar Lima. Mandua tahun Pulan jadi susuruhan pa haji gasan ma angkutakan karung bawang, karung gula, baras macam-macam ae.

Kada dirasanya lagi bilang asa pingkar balukuk hari-hari manyahan karung nang puluhan kilu nitu, napang ha mun hidup kadada dangsanak, kawitan matian hudah ka duanya, jadi kadada lagi nang diharap-harap. Sampai Pulan tapabini lawan si Limah anak acil Siti nang umpat ma ambil upah manguyak bawang di pasar tutih.

Bangsa satahun balaki babini lahir si Utuh, masih ae hidup Pulan balum pina mungkat bakadudukan, rumah masih umpat manyiwa di bidak pa haji Asli, Limah kada kawa lagi umpat basiang bawang imbah baranakan, bagana ae di rumah.

¤ ¤ ¤

Kada karasaan sakulah TK Utuh, pina mauk pulang ma’adi bininya Pulan. Taungut Pulan mamikirakan panghidupan mun kakaini haja. Taingat pas tahun tadi inya bulik ka banua handak jarah ka kubur kawitannya. Naik ka rumah mamarinanya, julak tuha pina kada rigi malihat Pulan batalu baranak pina sakit.

“Siapa?” ujar julak tuha pas malihat Pulan saparanakan badiri di muhara lawang.

“Ulun lak ay, Pulan, anak Jamiyah.”

“ih, Pulan kah? Adul lah abah kam.” Ujar Julak Tuha sambil maniring nang batalu baranak tu tih.

Pina riwas muha julak malihat parigal kamanakan nang di ujut niti. Asa kada rigi malihat Pulan pina uyuh mambawa tas buruk, nang bini babaju lungris kubas banar tukaran ari raya ampat tahun nang liwat pina kuhay kada bapakayan napa apa, apa lagi mun maliat muha si utuh pipinya batampung lantaran hingus pina mangaring kana palit wan bajunya nang bagambar Power Rangers batual di alah dadanya bakas muak dalam mutur kul tadi.

“Ayja, masukan dahulu, diaku handak ka muhara satumat tah.” ujar julak pina takurisit dahi.

“Siah!” jar julak mangiyaw minantu sidin. “ulahakan banyu lah!”

Lalu turun julak, hadang dihadang sajam dua jam kada naik lagi julak tuha. Asa kada nyaman Pulan kada jadi bamalam, imbah ka kubur uma abahnya badadas ae bulikan.

Pulan kada tahu, bangsa saparapat jam kalu imbah julak turun ti, sidin manalipun ka hapi Siah.

“U, Siah, bulikan nah sudah Pulan ti? Aku mun buhannya bulikan naik ay, bahujung maminta baras atawa bahutang banaray urang kaitu.” Umay, liwar pang pamuntungan julak ni.

¤ ¤ ¤

Kada kawa aku mun kakaini haja, damhati Pulan, supan aku kada dianggap kulawarga ulih dangsanak uma.

“MUN KADA SUGIH AKU KADA BULIK LAGI KA BANUA !” Batugul banar kahandak hati Pulan, basumpah inya sambil mamusut banyu mata wan pancung tapih.

Pulan ti ampih pang ba angkut, wahini inya manunggu’i toko pa haji Asli yang di Pasar Hanyar, barang pancarakinan jua. Sudah babarapa hari ni inya pina taungut saurangan. Lalu dirawa ulih pa haji.

“Uy, Pulan! Napa pina marung haja muha, napa dipikirakan?” ujar haji pas Pulan ma atar duit saturan badagang ari kamarian.

“Anu, pa haji ay, ulun ni. . . Tapi pian jangan sarik lah, kalu ulun ni tapalampang.” ujar Pulan asa gair.

“haw, napa garang?” Bingung pa haji.

“Ulun ni, umanya utuh pina mauk, ma’adi paji ae, mana Utuh sakulah sudah jadi ulun ni asa handak ae baisi usaha saurang. . .” Pulan manarik hinak.

“Ay, bujurkah? Adalah kam bamudal? Handak usaha napa?” pa haji kada sarik.

“Ada pang kios pun mama mintuha bakas sidin bawarung nasi dahulu kada tapakai lagi, sidin gagaringan haja di rumah, jar sidin jaka diusahai napakah, badagang napakah.” Pulan manjalasakan maksud hatinya.

“Nah, bagus tu, badagang napa ikam cagar Pul? Aku hakun ae mamudaliakan mun ikam hakun.” ujar haji Asli.

Langsung simbak simbur banyu mata Pulan, diciumnya tangan pa haji, dipaluknya, dianggapnya asa kaya kuitan.

¤ ¤ ¤

Imbah tujuh tahun tumbang tumbalik bausaha saurang, badagang pancarikinan jua kaya pa haji, akhirnya kawa jua pina tanyaman. Kawa mambulikakan hutang mudal, manukar rumah, ma umrahakan mintuhanya. Limah imbah dua anaknya ganalan kawa jua batoko baju di pasar Sudimampir, bakakariditan mulai kumplik sampai ka handil. Singkat kata, naik ka atas putaran ruda kahidupan si Pulan wan Limah barakat cangkal barakat sabar.

Pas taluwalas sudah bilangan tahunnya Pulan bausaha di Banjar, handak ae bulik ka banua manjarahi kubur kawitan wan maliati adakah lagi mamarina wan kula-kula an nang masih hidupan.

Nang sakali ni Pulan tulak ba ampat baranak, si Utuh kalas 6 SD sudah, si Aluh kalas 1 SD

¤ ¤ ¤

Nah, tapaksa basambung kita ka episod salanjutnya, apa mun mangatik di hapi ni kada muat banyak karakternya.

Dan juga, maaf banget buat yang gak paham bahasa Banjar, cerita ini saya buat tanpa penjelasan/terjemahannya. Saya sendiri saja dibuat pusing juga karena ternyata tak mudah merangkai kata-kata jadi sebuah cerita dalam bahasa daerah.